| Можно много рассуждать о том, что сделано, а что не сделано. Но главное заключается в том, что мы повернулись лицом к нашему северу |
| Пресс-конференция |
 |
| 17 Августа 2012 года, 18:37 |
|
Егор Борисов суруналыыстары кытта көрүстэ Атырдьах ыйын 15 күнүгэр СӨ Президенэ Егор Борисов өрөспүүбүлүкэ хаһыаттарын, телевидениетын, араадьыйатын уонна иһитиннэрэр-кэпсиир интернет-агентстволарын суруналыыстарыгар пресс-конференция оҥордо. Саха сирин аҕа баһылыга СМИ бэрэстэбиитэллэрин кытта бүтэһигин икки ый анараа өттүгэр, бэс ыйын 6 күнүгэр, көрсүбүтэ. Ааспыт кэм иһигэр өрөспүүбүлүкэҕэ бэрт элбэх улахан-кыра тэрээһин буолан ааста. Олортон сүрүнүгэр президен бэйэтин сыанабылын биэрдэ.Егор Борисов саха төрүт бырааһынньыга – Ыһыах быйылгы түһүлгэтин тэрийиигэ уонна ыытыыга үрдүк сыананы быста. Сылтан-сыл тугу эрэ саҥаны киллэрэр, хас биирдии түһүлгэни уратылаах оҥорор сөптөөҕүн эттэ. Быйылгы Ыһыахха Гиннес уочараттаах рекорда олохтонон, саха төрүт бырааһынньыгар уопсастыбаннас болҕомтотун күүскэ тарта уонна дьон-сэргэ санаатын лаппа көтөхтө. Итиннэ даҕатан президен эһиилги Олоҥхо ыһыаҕа Мэҥэ-Хаҥалас улууһугар ыытылларын бэлиэтээтэ. Егор Борисов от ыйыгар ыытыллыбыт «Азия оҕолоро» V норуоттар икки ардыларынааҕы спортивнай оонньууларга үрдүк сыананы биэрдэ. Маныаха кини өрөспүүбүлүкэ салалтата күрэхтэһиилэргэ бэлэмнэнии чэрчитинэн Саха сирин киин куоратын бэрээдэктиир сорук туруорбутун бэлиэтээтэ. Ол толору кыаллыбата эрээри, куорат киинэ уонна дьон, ыалдьыттар сылдьар сирдэрэ тупсаҕай көрүҥнэннилэр диэн билиннэ президен. Биир суруналыыс спорт объектарын тутуутугар сыһыаннаах ыйытыытыгар, Егор Борисов бэс ыйын бүтүүтүгэр РФ Счетнай балаатата Дьокуускай куорат саҥа спортивнай объектара үлэҕэ бэлэмэ суохтар диэн айдааннаах түмүгү таһаарбытыгар, өрөспүүбүлүкэ борокуратууратын бэрэбиэркэтин бэйэм көҕүлээбитим диэн хоруйдаата. Саҥа спортивнай тутуулары салгыы үлэлэтии былаанын туһунан кэпсэтиигэ, Егор Афанасьевич хас биирдии улахан объекка булгуччу оҕо спортивнай оскуолаларын арыйалларын, ону таһынан Саха сирин олимпиецтарыгар эрчиллэргэ сөптөөх усулуобуйаны хайыы-үйэ тэрийэ сылдьалларын эттэ. Өрөспүүбүлүкэ баһылыга атырдьах ыйын саҕаланыытыгар Үс Хатыҥҥа ыытыллыбыт «СахаСелигер» форуму улахан суолталаах тэрээһининэн ааҕар. Егор Борисов толкуйунан, ыччаты кытта санааны атастаһарга төһө кыалларынан элбэх түһүлгэни тэрийиэххэ наада. Президен эппитэ таах хаалбат, олоххо киирэн иһэр. Кини көҕүлээһининэн өрөспүүбүлүкэтээҕи «МИНИИСТИР» оонньууга араас сылларга кыттыбыт дьон сэһэргэһэр, санаа атастаһар кулууптара тэрилиннэ. Кулууп бастакы мунньаҕар уопсастыба уонна былаас итэҕэйсиилэрин уустуктарын туһунан дьоһун кэпсэтии таҕыста. «СахаСелигер» туһунан этэригэр, Егор Борисов эдэр дьон бары бырайыактарын, бастакы көрүүгэ кыаллыбат да курдуктары кытта өйөнүллүөхтээҕин тоһоҕолоото. – Ыччат этиитин ылыммакка, айымньылаах үлэҕэ баҕатын харгыстыахтааҕар, үлэлииргэ кыах биэрбит кэннэ, толкуйдаабыта олоххо кыайан киллэриллибэтин бэйэтэ өйдүүрэ быдан ордук, – диэн быһаарда ити этиитин өрөспүүбүлүкэ президенэ. Өрөспүүбүлүкэҕэ уһулуччу туһалаах тэрээһининэн Егор Борисов от ыйын бүтүүтүгэр Дьокуускай куоракка ыытыллыбыт «XXI үйэ – Россия суоллара» XII норуоттар икки ардыларынааҕы форуму ааттаата. Форумҥа РФ транспортка министиэристибэтэ уонна Суол федеральнай агентствота кыттаннар, Саха сирин суолга хаһаайыстыбатын сайыннарыы үгүс боппуруостара миэстэтигэр быһаарылыннылар. Ол иһигэр өрөспүүбүлүкэ федеральнай суолталаах «Лена», «Халыма», «Бүлүү» суолларын көрүүгэ-харайыыга государственнай өйөбүл объемун улаатыннарыы ситиһилиннэ. Бэлиэ түгэнинэн Саха Өрөспүүбүлүкэтин Бырабыыталыстыбата уонна «РАО ЭС Востока» холдинг «Саха сиринээҕи 2 -с ГРЭС тутуу» бырайыагын олоххо киллэриигэ үлэлэһиигэ Сөбүлэһии түһэрсибиттэрэ буолар. Электростанцияны тутуу Саха сирин киин оройуоннарыгар энергия өттүнэн куттал суох буолуутун хааччыйыаҕа уонна өрөспүүбүлүкэ киин куоратын салгыы сайыннарарга эбии кыаҕы биэриэҕэ. Суруналыыстары кытта атах тэпсэн олорон кэпсэтиигэ, өрөспүүбүлүкэ президенэ Саха сирин олохтоохторо «Өлүөнэ остуолбалара» национальнай айылҕа пааркатын ЮНЕСКО аан дойдутааҕы нэһилиэстибэтин испиэһэгэр киллэрии суолтатын толору өйдүү иликтэрин бэлиэтээтэ. Егор Борисов «Өлүөнэ остуолбалара» национальнай айылҕа паарката ЮНЕСКО аан дойдутааҕы нэһилиэстибэтин испиэһэгэр киириитэ, киһи аймах сайдыытыгар сүҥкэн оруоллаах диэн толкуйдаах, тоҕо диэтэргит Өлүөнэ остуолбалара наукаҕа Сир историятын үөрэтиигэ сүдү суолталаахтар. Тус бэйэтэ кыттыбыт, болҕомтону тарпыт кэлиҥҥи тэрээһиннэр ахсааннарыгар Егор Борисов «Сколково» фонданы кытта сөбүлэһии түһэрсиитэ ыытыллыбыт Петербурдааҕы норуоттар икки ардыларынааҕы экономика форумун, дойду премьер-миниистирэ Дмитрий Медведев бэрэссэдээтэллээбит Дальнай Восток, Иркутскай уобалас, Бурятия Өрөспүүбүлүкэтин уонна Забайкалье кыраайын социальнай-экономическай сайдыыларын боппуруостарыгар государственнай хамыыһыйа мунньаҕын, РФ Президенэ Владимир Путин салайан ыыппыт Государственнай сэбиэт мунньаҕын уонна да атыттары киллэрэр. Егор Борисов Россия премьер-миниистирэ Дмитрий Медведевы, оборона миниистирэ Анатолий Сердюковы, өрөгүйүөннэри сайыннарыы миниистирэ Олег Говоруну кытта көрсүһүүлэрэ, РФ бырабыыталыстыбатын бэрэссэдээтэлин солбуйааччыта Аркадий Дворковичка мунньах, итиэннэ Саха сиригэр спорт миниистирэ Виталий Мутко, гражданскай оборона дьыалатыгар, ыксаллаах быһыыга-майгыга уонна айылҕа таһаарбыт алдьархайын туоратыыга миниистир Владимир Пучков, транспорт миниистирэ Максим Соколов, тыа хаһаайыстыбатын миниистирэ Николай Федоров уонна ыччат дьыалатыгар федеральнай агентство баһылыга Сергей Белоконев кэлиилэрэ өрөспүүбүлүкэҕэ улахан суолталаннылар. Пресса бэрэстэбиитэллэрин кытта кэпсэтиигэ Егор Борисов үлэтин графигын көрдөрөөрү ааспыт нэдиэлэни холобурдаата. Ол курдук, атырдьах ыйын 6 күнүгэр, бэнидиэнньиккэ, кини Красноярскайга РФ Куттала суох буолууга Сэбиэтин сэкирэтээрэ Николай Патрушев ыыппыт Ураалга, Сибииргэ уонна Дальнай Востокка государственнай транспортнай политиканы олоххо киллэрэргэ национальнай куттал суох буолуутун хааччыйыы эбии миэрэлэрин көрүү мунньаҕар кыттыбыта. Оптуорунньукка, атырдьах ыйын 7 күнүгэр, Новосибирскайга Дмитрий Медведев өрөгүйүөннэргэ сөмөлүөтүнэн дьону, таһаҕаһы таһыы боппуруостарыгар ыыппыт мунньаҕар бэйэтин этиитин киллэрбитэ. Сэрэдэҕэ, атырдьах ыйын 8 күнүгэр, бу сырыыга Москваҕа Аркадий Дворковичка Саха Өрөспүүбүлүкэтин оҥорон таһаарар күүһүн, транспорын уонна энергетикатын 2020 сылга диэри кэлимник сайыннарыы Схематын олоххо киллэрии хаамыытыгар анаммыт уһулуччу суолталаах улахан мунньахха сүрүн дакылааты оҥорбута. Чэппиэргэ, атырдьах ыйын 9 күнүгэр, Егор Борисов Сергей Белоконевтыын Дьокуускайга «СахаСелигер» тэрээһиннэригэр кыттан, күнүн сайдам ыччаты кытта кэпсэтиигэ анаабыта. Салгыы кэлэр атырдьах ыйын 10-11 күннэригэр президен тыа хаһаайыстыбатын миниистирэ Николай Федоровы кытта үлэлээбитэ, киниэхэ «Амгинский» тыа хаһаайыстыбатын производственнай кооперативын Амма улууһун Покровка сэлиэнньэтигэр Чомполоох учаастагын, Нам улууһун Кыһыл Сыыр сэлиэнньэтин ыччакка анаммыт кыбаарталын, Жатай таһыгар үлэлиир «Эм Григорий» бааһынай хаһаайыстыбаны уонна Хаҥалас улууһун Улахан Аан сэлиэнньэтигэр баар сылгы собуотун көрдөрбүтэ. Пресс-конференцияҕа Егор Борисов суруналыыстарга өрөспүүбүлүкэ дьыалатын-куолутун туругун туһунан сиһилии сэһэргээтэ. Ол иһигэр саҥа үөрэх дьылыгар уонна оттук сезонугар бэлэмнэнии, оттооһун, уунан таһаҕаһы таһыы сайыҥҥы соруктарын толоруу уонна да атын туһунан. Биллэрин курдук, өрөспүүбүлүкэҕэ от былаанын толорууга уустук балаһыанньа үөскээн эрэр. Иккис сылын турбут курааны, быйыл от үгэнигэр Лена уутун таһыма эмискэ үрдээн эбии ыаратта. Ити түмүгэр, өрүс арыытын охсуллубут ходуһалара бары кэриэтэ уу анныгар бардылар. Президен былааннаммыт 555 тыһыынча тоннаттан бүгүҥҥү күҥҥэ өрөспүүбүлүкэ үрдүнэн 250 тыһыынча тонна от бэлэмнэммитин иһитиннэрдэ. Итини таһынан 14,8 тыһыынча тонна сенаж уонна 12,2 тыһыынча тонна сиилэс бэлэмнэнэрэ былааннанар. Егор Борисов бу былааннар олохтоохторугар уонна булгуччу туолалларыгар эрэллээҕин биллэрдэ. Өрөспүүбүлүкэ аҕа баһылыга билэринэн тыа сирин олохтоохторун сорохторо итинтэн ыарырҕатаннар күһүн сүөһүлэрин сүүскэ биэрэр санаалаахтар. Егор Борисов дьон санаатын өрө көтөҕөрү булгуччулааҕынан ааҕар. Тоҕо диэтэргит өрөспүүбүлүкэҕэ кыһын устата ынах сүөһүнү, сылгыны аһылыгынан хааччыйарга кэккэ миэрэлэр хайыы-үйэ ылыллыбыттара. Биирдиилээн ылан көрөр буоллахха, өрөспүүбүлүкэ бюджета кураантан эмсэҕэлээбит улуустарга атын оройуоннартан атыылаһыллыбыт эбэтэр онно бэлэмнэммит оту тиэйии ороскуотун сабарга бэлэм. Итини таһынан өрөспүүбүлүкэ ааспыт сылларга тыа сирин олохтоохторун кыһалҕаларыгар 2 тыһыынча тонна кэриҥэ булкаастаах аһылыктары атыылаһар эбит буоллаҕына, быйыл бу сыыппара 10, 15 тыһыынча тоннаҕа тиийэ улаатыаҕа. Өссө биир уһулуччу суолталаах түгэн: бүгүҥҥү күҥҥэ диэри өрөспүүбүлүкэҕэ тыа хаһаайыстыбатын өйөөһүн сүөһүнү иитииттэн ылыллар бородууксуйаны элбэтиигэ туһуланар эбит буоллаҕына, быйылгы ыксаллаах быһыынан-майгынан сибээстээн, тыа хаһаайыстыбатын өйөбүлэ сүөһү ахсаанын аҕыйаппат туһугар ыытыллар үлэҕэ барыаҕа. 2013 сылы кытта хабар туһааннаах ыйаахха президен сотору илии баттыыр былааннаах. Егор Борисов икки чаастаах пресс-конференция кэмигэр итиэннэ суруналыыстар өрөспүүбүлүкэ олоҕун бары өрүтүн таарыйар үгүс ыйытыыларыгар эппиэттээтэ.
|