Попытки разыгрывать национальную карту в политических целях периодически предпринимались и раньше. Предпринимаются они и сейчас. Но эти попытки не должны сбивать нас с пути, вносить смуту в умы людей, особенно молодежи. |
| сонуннар |
 |
| 19 Августа 2010 года, 21:38 |
|
Аанньаах хочотун дьоро күнэ Саха республикатын Президенэ Е.А.Борисов атырдьах ыйын 15 күнүгэр Өлүөхүмэ улууһугар үлэлээтэ. Кырдьаҕас Өлүөхүмэ куората төрүттэммитэ 375 сылынан уонна Саха сирин норуоттарын V спортивнай оонньуулара ыытылларынан сэргэхсийбит. Киин уулусса устатын тухары бу икки дьоґун суолталаах дьаһалларынан эҕэрдэлиир билбортар ыйаммыттар, элбэх саҥа тутуулар дьэндэйбиттэр... Хатыҥ чараҥ былаастаах тумустаан киирбит тоҕойтон Өлүөнэ эбэ хотун ытыска уурбуттуу нэлэһийэр кэрэ көстүүлээх сиригэр, Аанньаах хочотугар киирэр аартыкка, икки норуот доҕордоһуутун туоһута буолан ураһа уонна православнай кириэс кэккэлэспиттэр. Президент улууска сырыыта бу ытык сиртэн саҕаланна. Саха сирин норуоттарын V спортивнай оонньууларын тэрийэр комитетын кытары көрүстэ. Онно тыл эппиттэр Егор Афанасьевичка бүгүн төрөөбүт күнэ буоларын санатан, эҕэрдэлээн киирэн барбыттарыгар, Президент ити государственнай суолталаах сабыытыйа буолбатах, биир киһи тус дьыалата диэн тохтотон кэбистэ. Өлүөхүмэ улууһугар 114 сэрии кыттыылааҕын огдообото баар. Улуу Кыайыы 65 сылынан 50 огдообоҕо толору хааччыллыылаах дьиэ бэриллибит, ол иһиттэн 10 киһи сертификатынан Дьокуускайга уонна Нерюнгрига квартира ылбыттар, 40 огдообоҕо Филатов уул. 15 №-гар тутуллубут саҥа дьиэ анаммыт. Кэлэр өттүгэр аны 47 кырдьаҕаһы дьиэнэн хааччыйыы боппуруоһа быһаарыллыахтаах. Егор Афанасьевич саҥа дьиэҕэ икки хостоох квартираны ылбыт Т.В.Кутугутоваҕа ыалдьыттаата. Тамара Васильевна кэргэнэ Артемий Львович Сокорутов 1923 с. Токкоҕо төрөөбүт. Уоттаах сэрии сылларыгар Үһүс Украинскай фроҥҥа сэриилэспит. 1974 с. өлбүт. 82-с хаарыгар үктэммит ытык кырдьаҕас Президенигэр дьиэтэ үчүгэйин, итии-тымныы уута баарын кэпсээтэ, маннык сүдү кыһамньы иһин махтанна. -- Сааһым тухары холкуоска, сопхуоска үлэлээбитим, -- диир кини. -- Үлэ удаарынньыга этим. Биэс оҕолоохпун, тоҕус сиэннээхпин, аны хос сиэннэр кэлэн эрэллэр. Быйыл тутуу бөҕөтө барда. Ниэп ситимэ баар, аны улахан уот кэлэн эрэр үһү дии. -- Кэлэр, -- диир Егор Афанасьевич. -- Ити Сунтаартан ГЭС каскадын уота, балаҕан ыйыгар үлэҕэ киириэ. Онон, Өлүөхүмэ улаханнык сайдар кэскиллээх. -- Бэйэҥ хайа дойдугунуй? -- Чурапчыбын. Сэрии саҥана Чурапчыттан икки аҥар тыһыынча киһини хоту көһөрбүттэрэ. -- Ээ, оннук баарын истибитим. Дьэ, ама ааспытын иһин, сүрдээх кэмнэр ааспыттара… -- Чэ, доруобай эрэ буол, бачча үчүгэй дьиэлэн-уоттанан бараҥҥын, аны эн оҕолоргор иитиллэр, атаахтыыр кэмиҥ, -- диэтэ Егор Афанасьевич уонна саҥа дьиэлээх хаһаайкага чэй иһэр сервиһи бэлэхтээтэ. Президент салгыы тыыл бэтэрээнэ, үс сэрии кыттыылааҕын огдообото В.И.Габышеваны көрүстэ. Болдьообут курдук, Валентина Ивановна бүгүн төрөөбүт күнэ эбит, онно саҥа дьиэлэммитинэн, куорат үбүлүөйүнэн уонна төрөөбүт күнүнэн республика баһылыгын эҕэрдэтин тутан, ааһа баран Президенниин биир күн төрөөбүтүттэн долгуйан хаалла. Егор Афанасьевич күнүс 4 чаастан дьаһалта дьиэтин аактабай саалатыгар Өлүөхүмэ куората төрүттэммитэ 375 сылынан норуот хаһаайыстыбатын араас салаатын бастыҥ үлэһиттэригэр правительственнай наҕараадалары туттарда. -- Күндү доҕоттор, бастатан турар Өлүөхүмэ куоратын төрүттэммитэ 375 сыллаах үбүлүөйүнэн эҕэрдэлиибин, -- диэн саҕалаата бэйэтин эҕэрдэтин Егор Афанасьевич. -- Үбүлүөй дьаһаллара Саха сирин норуоттарын V спортивнай оонньууларын кытары алтыспыта икки төгүл үөрүүлээх. Спортивнай оонньуулар ис хоһоонноро сылтан-сыл байытыллан, ураты суолталанан иһэр, республика культурнай-общественнай, духуобунай олоҕор ылар оруола үрдүүр. Куорат 375 сыллаах үбүлүөйүнэн уонна Саха сирин норуоттарын спортивнай оонньуулар түһүлгэлэрин тэрийэринэн Өлүөхүмэ улууһа республикаттан улахан көмөнү ылан, дьоһун хамсааһыны таһаарда. Ол курдук, «Сунтаар-Өлүөхүмэ» ЛЭП ситимэ тутуллан кэлэр ыйтан үлэҕэ киириэ, итинэн, республика оҥоруулаах күүстэрин сайыннарыыга дьоһун миэстэни ылар Аанньаах сиригэр Бүлүүтээҕи ГЭС энергията туһаныллыа. Элбэх дьиэ-уот тутулунна, суол-иис оҥоһулунна. Ол иһигэр, 3 тыһыынча миэстэлээх стадион, 500 миэстэлээх «Чароит» спортивнай комплекс баар буоллулар. Бу сыалга бюджеттан 50 мөл. солк. көрүллүбүтэ, ону таһынан, инвестордар тардыллыбыттара. 2012 с. Дьокуускайга «Россия – спортивнай держава» спортивнай форум уонна ол чэрчитинэн «Азия оҕолоро» норуоттар икки ардыларынааҕы V спортивнай оонньуулар ыытыллыахтара. Бүгүн аһыллар түһүлгэни бу форумҥа бэлэмнэнии быһыытынан сыаналыахха сөп. Онон, бу оонньуу суолтата улахан, ону эһиги улуускут үрдүк таһымҥа көрүстэ. РФ улахан өйөбүлүн уонна бу иннинээҕи сылларга ситиһиллибит таһымы мүччү туппакка, эбии чиҥэтэн, саҥа кирбиилэргэ тахсар туһугар сөптөөх политика ыытыллыбытын түмүгэр, республикабытын Аан дойду үрдүнэн бүрүүкээбит үп-харчы кризиһэ улаханнык хаарыйбата. Биһиэхэ барыта баар: баай сир-уот, билиигэ-көрүүгэ, үлэҕэ-хамнаска тардыһыылаах нэһилиэнньэ. Онон, бары биир киһи курдук турунан, үлэлиэххэ-хамсыахха эрэ наада. Егор Афанасьевич киэһэ Өлүөхүмэ куорат 375 сыллаах үбүлүөйүн уонна Саха сирин норуоттарын V спортивнай Оонньууларын аһыллыытыгар сырытта. Ключевые слова: |