Промышленнай оройуоннарга уонна тыа улуустарыгар икки өттүттэн барыстаах атыылыыр-эргинэр усулуобуйа тэриллиэхтээх 

Саха Республикатын Президенэ Егор Борисов сэтинньи 5 күнүгэр Нерюнгри куорат 35 сыллаах үбүлүөйүн үөрүүлээхтик бэлиэтээһиҥҥэ кытынна. Республика баһылыга суруналыыстары кытта көрсөн, кинилэр ыйытыыларыгар хоруйдаата.

- Егор Афанасьевич, билиҥҥи усулуобуйаҕа промышленнай, чуолаан бу Нерюнгри курдук оройуоннар, уонна тыа сирин улуустарын икки ардыларыгар ситими, сибээһи хайдах сайыннарыахха сөбүй?

- Кэлиҥҥи кэмҥэ Правительство промышленнай оройуоннары кытта үлэни саҥа таһымҥа таһаарар ирдэбили туруорар. Биһиги өйдүүрбүтүнэн, саҥа кэлбит инвестордар производстволара олохтоох табаарынан хааччыллыахтаахтар, кинилэр бу боппуруоһу өйүөхтээхтэр. Онуоха тыа хаһаайыстыбатын бородууксуйатын оҥорор улуустар бэйэлэрин кыахтарын көрүнэн ити улахан тэрилтэлэри, инвестордары кытта дуогабар түһэрсиэхтээхтэр.

Бу үлэ өрдөөҕүттэн ыытыллар. Холобура, Нерюнгри оройуонун кытта Чурапчы, Амма, Мэҥэ-Хаҥалас улуустара уруккуттан ыкса сыһыаннаахтар. Ол курдук, Нерюнгрига киин улуустарга оҥоһуллар тыа хаһаайыстыбатын бородууксуйата атыыланар. Атыыны-эргиэни тэрийэр туһуттан ити улуустар дьаһалталара куорат салалтатын кытта дуогабар түһэрсэллэр. Маннык усулуобуйаны биһиги бүгүн Алдан оройуонугар, Томмот бөһүөлэгин базатыгар тэрийэбит. Ленскэй улууһугар нефть, газ хостооһунун сайдыытыгар сөп түбэһиннэрэн, агропромышленнай комплексы, тыа улуустарыттан тиийэн үлэлиир-хамныыр усулуобуйаны тэрийиэхтээхпит.

Онон билигин урукку курдук биһиэхэ матырыйаалла, үптэ-аста аҕалыҥ диэн илиини эрэ уунар өйдөбүл сүтэн турар. Ырыынак усулуобуйатыгар босхо туох да оҥоһуллубат. Промышленнай оройуоннарга уонна тыа улуустарыгар икки өттүттэн барыстаах атыылыыр-эргинэр усулуобуйа тэриллиэхтээх. Тыа улуустара  бородууксуйаларын батарар ырыынактаныахтаахтар. Манна биһиэхэ «АЛРОСА» компания Бүлүү бөлөх улуустарын кытта үлэтэ холобур буолар.