Стабильность – это неплохо. Но от стабильности нужно обязательно переходить к повышению качества жизни. Иначе стабильность рано или поздно приводит к стагнации. |
| Бэлиэ тэрээһин |
 |
| 27 Сентября 2012 года, 12:11 |
|
Саха Өрөспүүбүлүкэтин Президенэ Егор Борисов балаҕан ыйын 26 күнүгэр Таатта улууһун Баайаҕа нэһилиэгэр саҥа таас оскуоланы аһыы үөрүүлээх тэрээһинигэр эппит тыла Государственность күнүгэр биһиги өссө төгүл кэннибит диэки эргиллэн, туох остуоруйалаахпытын, туох олоҕу олорон кэлбиппитин ырытан, салгыы норуот быһыытынан хайдах сайдарбытын, сөптөөх суолу тутуһан иһэбит дуу, суох дуу диэн толкуйдаан көрүөх тустаахпыт. Сарсын омук быһыытынан сайдарбытыгар төһө кыах баарын, төһө үлэ-хамнас ыытыллыахтааҕын өйдөөн-төйдөөн ырыҥалыыр күммүт. Маннык үөрүүлээх түгэннэр, биһиги саҥа объектары үлэҕэ киллэриибит – чахчы сөптөөх суолу тутуһан айаннаан иһэрбитин бигэргэтэллэр. Сөмөлүөккэ, бөртөлүөккэ олордохпуна, көтөн иһэн толкуйдуур идэлээхпин. Бүгүн Дьокуускайтан бөртөлүөтүнэн көтөн иһэн, Аллараа Бэстээх саҥа оскуолатын, былырыын аһыллыбыт саҥа транспортнай техникумун, аттыгар турар быйыл үлэҕэ киириэхтээх уопсай дьиэтин, Төҥүлү саҥа оскуолатын, Уус-Алдан Бэйдиҥэтин бэртээхэй оскуолатын таһыгар оҕолор сырса сылдьалларын, Курбуһах үтүөкэн оскуолатын, кырдьаҕастарга анаммыт интернат-дьиэтин, онтон эһиэхэ кэлэн түһүүбүтүгэр, улахан хочуолунайы уонна саҥа оскуоланы көрөн, биһиги тыабыт сиригэр биллэр-көстөр уларыйыылар тахсан эрэллэр эбит диэн өйгө-санааҕа кэллим.  Бу барыта – биһиги Сахабыт Өрөспүүбүлүкэтин тыатын сирэ сайдыытыгар, тыатын сиригэр олох салҕанан барыытыгар тирэх буолар диэн өйдөбүллээх үлэ-хамнас ыытыллыыта, киһи хараҕар быраҕыллар буолбута үтүө өйдөбүлү хаалларар, сөптөөх суолу тутуһан иһэр эбиппит диэн эрэл кыымын саҕар.Онон бүгүн маннык сырдык-кэрэ күҥҥэ үтүө түгэн көстөн, эһиги бырааһынньыккытыгар кэлэн кытта турарбыттан киэн тутта саныыбын. Икки сыллааҕыта көрсүһүүбүтүгэр бэрт куһа5ан сирэйдээх-харахтаах дьон оскуола тутуллуохтааҕын туһунан хардарыта тыл этэн кэпсэтэрбитин бу баар курдук өйдүүбүн. Онно Президен быһыытынан бу оскуола баар буолуо, тутуллуо диэн тылбын биэрэн барбытым. Ол тылым бүгүн олоххо киирэн эрэриттэн улаханнык астынан, өрөгөйдөөн туран, эһигини кытта үөрүүгүтүн тэҥҥэ үллэстэбин. Өрөспүүбүлүкэбит тыатын сирин сайдыыта кэнэҕэскитин өссө күүскэ барыахтаах. Биһиги бу сыллар усталарыгар, ааспыт мунуу-тэнии кэмнэригэр тыа сиригэр олох быстыбатын туһугар, салҕанан барарыгар сөптөөх дьаһаллары ылынан, атын субъектар, кыраайдар, уобаластар курдук тыһыынчанан дэриэбинэлэри сүтэрбэккэбит, үгүс сирдэргэ сайдыыны төрүттээн, баччааҥҥа диэри тиийэн кэллибит. Онон мин сарсын буолаары турар улахан тэрээһини өйдөөн туран, кэлэр сылларга тыа сирин сайдыытыгар туһаайыллыбыт дьаһаллардаах улахан Ыйаахха бу киэһэ илии баттыахтаахпын. Ити Ыйаах олоххо сарсыҥҥыттан киириэҕэ. Докумуоҥҥа тыа сиригэр көмө, өйөбүл саҥа көрүҥнэрэ уонна олору балай даҕаны боччумнаах оҥорор механизмнар киирдилэр. Быйыл өрөспүүбүлүкэ киин уонна илин эҥэрин улуустарыгар айылҕа кубулҕатыттан сүрдээх элбэх ыарахаттар үөскээтилэр. Ити ордук тыа сиригэр олорор, тыа хаһаайыстыбатынан дьарыктанар дьоҥҥо-сэргэҕэ улахан охсуулааҕынан ситимнээн, Ыйаах кинилэри өйөөһүн быһыытынан уонна билигин тыа сиригэр чахчы быстыбат-ойдубат олохтоох-дьаһахтаах буолуохтаахпыт диэн санаанан салайтаран таһаарыллар.  Тыа сиригэр ыччаты үөрэтиигэ, каадырдары үөскэтиигэ, сыһыарыыга уонна инникитин тыа хаһаайыстыбатын сайыннарыы боппуруостарыгар улахан дьаһаллар ылыллыахтара. Ыйаахха тыа сирин нэһилиэктэригэр чааһынай дьиэлэри тутууга үлэ күүскэ ыытыллыахтааҕын туһунан дьаһал киирдэ, итиэннэ киин хочуолунайдарга чааһынай дьиэлэри холбооһун механизмнара көрүлүннүлэр. Тыа хаһаайыстыбатыгар оҥорон таһаарыыны сайыннарар туһуттан 2012 сылтан саҕалаан ынах сүөһү төбөтүгэр алталыы тыһыынча солкуобайы уонна кэлэр 2013 сылтан хас биирдии ынах төбөтүгэр уоннуу тыһыынча солкуобайы көмө бэрээдэгинэн хас биирдии хаһаайыстыбаҕа уонна кэтэх хаһаайыстыбаларга көрүөхпүт. Онон бу Ыйаах – кэлэр сылларга тыа сиригэр дьону-сэргэни олохсутарга, ыччаты хаалларыыга, производствоны сайыннарыыга туһуланар. Тыа сиригэр саҥа оскуолалары, киин хочуолунайдары, дьиэни-уоту тутуу уонна суолу-ииһи оҥоруу барыта ити докумуоҥҥа тирэҕирэн ыытыллыахтара.Бүгүҥҥү түгэнинэн туһанан, бастатан туран, нэһилиэк ыччаттарын, Баайаҕа орто оскуолатыгар үөрэнэр нэһилиэк, улуус уонна өрөспүүбүлүкэ кэскилин уонна оскуола педагогическай коллективын эҕэрдэлиибин! Баайаҕа нэһилиэгин дьонугар-сэргэтигэр барыгытыгар ситиһиини, дьолу-соргуну баҕарабын! Олоххут-дьаһаххыт тупсан истин, инникигитигэр эрэллээх буолуҥ! |
