| Эффективность управленческих действий должна определяться не числом, а умением, профессионализмом государственных менеджеров, повышением ответственности, оперативности, мобильности и прозрачности органов власти всех уровней |
| мунньах |
 |
| 18 Декабря 2012 года, 21:05 |
|
Егор Борисов: «Улахан болҕомто оҕо спордугар ууруллуохтаах» Ахсынньы 15 күнүгэр Саха Өрөспүүбүлүкэтин Президенэ Егор Борисов өрөспүүбүлүкэҕэ көҥүл тустууну сайыннарыы боппуруостарыгар спорт общественноһын кытта мунньахтаата. Мунньахха Саха сиригэр тустуу сайдыытын уонна уустуктарын туһунан дакылааты өрөспүүбүлүкэ ыччат политикатыгар уонна спорка миниистирин маҥнайгы солбуйааччыта Юрий Баишев оҥордо. Кини, бастатан туран, мустубут дьону бу күн Ил Түмэҥҥэ Саха Өрөспүүбүлүкэтигэр оҕо спордун туһунан сокуон ылыллыбытынан эҕэрдэлээтэ. Юрий Петрович иһитиннэрбитинэн өрөспүүбүлүкэҕэ бүгүн көҥүл тустуунан 244 тренер салалтатынан 12286 киһи дьарыктанар. Мантан 6 тыһыынчата оҕолор. Оҕолор спортивнай оскуолаларга 161 тренергэ дьарыктаналлар. Дмитрий Петрович Коркин аатын сүгэр Чурапчы спортивнай интернат-оскуолатыгар 19 тренер салалтатынан 443 оҕо, Сунтаар спортивнай оскуолатыгар 13 тренергэ – 320 оҕо, Олимпийскай резервэ училищетыгар 6 тренергэ юниордары кытта холбоон 47 оҕо, Үрдүкү спортивнай маастарыстыба оскуолатыгар 19 тренергэ – 126 оҕо дьарыктаналлар. Ааспыт олимпийскай циклга тренердэр өрөспүүбүлүкэ сүрүн тренерэ Степан Сивцев салалтатынан үлэлээбиттэрэ. 2008-2012 сылларга Саха Өрөспүүбүлүкэтигэр тустууну сайыннарыыга Үрдүкү спортивнай маастарыстыба оскуолатын салаатынан государственнай бюджеттан олимпийскай программаны уонна Виктор Лебедев бэлэмнэниитин ааҕан туран, 80-тан тахса мөлүйүөн солкуобай көрүллүбүт.Юрий Баишев улуустарга тустуу отделениялара сабыллаталаан эрэллэрин, оройуон дьаһалталара оҕо спортивнай оскуолаларын сөптөөхтүк үбүлээбэттэрин, улуус чемпионаттара ыытыллыбаттарын, хотугу оройуоннар өрөспүүбүлүкэ күрэхтэһиилэригэр кэлии-барыы сыаната үрдүгүттэн кыайан кэлбэттэрин, интернаттар мас тутуулаах буолан ирдэбилгэ эппиэттээбэттэрин уонна тустуу тренердэрэ наһаа намыһах хамнастаахтарын бэлиэтээтэ уонна 2013-2020 сылларга өрөспүүбүлүкэҕэ көҥүл тустууну сайыннарыы Концепциятын билиһиннэрдэ. Өрөспүүбүлүкэ ыччат политикатыгар уонна спорка миниистирин маҥнайгы солбуйааччыта хотугу улуустарга зональнай күрэхтэһиилэри сөргүтэр уонна Уус-Алдаҥҥа, Горнайга, Томпоҕо, Бүлүүгэ, Орто Халымаҕа уонна атын улуустарга тустуу специализированнай тирэх кииннэрин арыйар туһунан этии киллэрдэ. Олимпийскай циклга ыытыллыбыт үлэ туһунан иһитиннэриини өрөспүүбүлүкэ көҥүл тустууга сүрүн тренерэ Степан Сивцев оҥордо. Кини ааспыт түөрт сыл иһигэр спортсменнары эрчийии, күрэхтэһиигэ бэлэмнээһин таһынан өрөспүүбүлүкэ салалтатын кытта спорт политикатыгар уонна спорт медицинатын сайыннарыыга улахан үлэ ыытыллыбытын бэлиэтээтэ. Степан Петрович түмүккэ үрдүк кылаастаах спортсменнары бэлэмниир система өрөспүүбүлүкэҕэ атаҕар саҥа бигэтик туран эрэр дии саныырын эттэ. Маны сэргэ мунньахха 2013 сылга Софияҕа буолуохтаах ХХII Сурдлимпийскай оонньууларга бэлэмнэнии туһунан иһитиннэриини көҥүл тустууга өрөспүүбүлүкэ дьүлэй спортсменнарын сүрүн тренерэ Василий Стручков оҥордо. Бу кэнниттэн дьон санаатын, этиитин истии буолла. Барыта 15 киһи, ол иһигэр спорт ветераннара, тренердэр, тустууктар уо.д.а. дьон тыл эттилэр. Элбэх араас этии киирдэ, туох итэҕэс-быһаҕас баара, туох тиийбэтэ барыта ыйылынна. Егор Борисов үс чаастан ордук кэм устата барбыт мунньаҕы түмүктүүрүгэр, аһаҕас кэпсэтии тахсыбытыттан астыммытын биллэрдэ. Президен саха дьоно тустууктартан урукку улахан кыайыыларга олоҕуран, элбэҕи ирдиирин, эрэйэрин, ону тулуйуллуохтааҕын, ол гынан баран сорох дойдуларга оннооҕор олимпиадаҕа кыттар путевка ылар кыаллыбатын, чуолаан Монголия соторутааҕыта эрэ олимпийскай чемпионнаммытын, онон кытаанах илин-кэлин түсүһүү барарын өйдүөхтээхпитин, бөҕөстөрбүт улахан күрэхтэһиилэргэ киирсиилэрэ өрөспүүбүлүкэ имиджигэр улахан туһалааҕын эттэ. Егор Борисов көҥүл тустуу боппуруостарын кэлимник көрөр сөптөөҕүн, оҕо, улахан дьон уонна ветераннар спортарын тэҥҥэ сайыннарыахтаахпытын, улахан болҕомто оҕо спордугар ууруллуохтааҕын бэлиэтээтэ уонна үөрэх, спорт, экономика, үп министиэристибэлэригэр итинэн сирдэтэн үлэлииллэригэр соруйда. Өрөспүүбүлүкэ баһылыга талааннаах оҕолору көрдүөхтээхпит, ол инниттэн сөптөөх усулуобуйаны, спортивнай интернаттары тэрийдэхпитинэ сатанар, ыччат политикатыгар уонна спорка министиэристибэ үлэһиттэрэ манан дьарыктаныҥ диэн дьаһайда. Маны сэргэ эчэйбит тустуук Дмитрий Валеев эмтэнэ барарыгар Бырабыыталыстыбаттан көмө көрөргө эрэннэрдэ. Егор Борисов тренердэргэ хамнаһы үрдэтэр туһунан инники дьаһалын санатан туран, Үрдүкү спортивнай маастарыстыба оскуолатыгар эрчиллэр-үлэлиир инструктор-спортсменнарга хамнастарын үрдэтэргэ уонна Россия сүүмэрдэммит хамаандатыгар киирбит атын көрүҥүнэн дьарыктанар спортсменнарга кытта хамнас көрөргө соруйда. Өрөспүүбүлүкэ баһылыга саҥа олимпийскай цикл саҕаламмытынан ситимнээн уонна барытын бэйэтэ көрө-истэ олоророору, Президеҥҥэ үлэлиир спорка сэбиэти сыл бүтүөр диэри тэрийэргэ дьаһал биэрдэ. Итини сэргэ Егор Борисов тренердэр боппуруостарын туспа мунньах тэрийэн, онно көрүөхпүт диэтэ. Егор Борисов кэлиҥҥи үс сылга спорду үбүлээһин үс аҥар төгүл улаатыннарыллыбытын бэлиэтээтэ. Президен спорт, итиэннэ үп министиэристибэлэригэр үп боппуруоһугар этиилэри киллэрэргэ, спорт икки сүрүн көрүҥэр болҕомтону ордук уурарга уонна олимпийскай ахсааныгар киирбэт көрүҥнэр программаларын хаттаан көрөргө соруйда. Маны сэргэ үп-харчы кэлиитэ-барыыта дьэҥкэ буолуохтааҕын ыйда. Спорт салайааччыларынан уонна тренердэринэн кими аныыр боппуруоһугар, Егор Борисов булгуччу улуу спортсменнары диэн этии сыыһатын, ол оннугар үчүгэй учуутал, психолог уонна тэрийээччи буолуохтаахтарын ыйда. Кини манна Дмитрий Петрович Коркины, Николай Николаевич Тарскайы холобур быһыытынан аҕалла. Өрөспүүбүлүкэ баһылыга оскуолаларга, нэһилиэктэргэ уонна улуустарга чемпионаттары ыытыы боппуруоһун толкуйдуурга уонна күрэхтэһиилэр таһымнарыттан көрөн бирииһи туруорууну, ол иһигэр хапсаҕайга эмиэ, бэрээдэктииргэ ыҥырда. Түмүккэ Егор Борисов 2013-2020 сылларга өрөспүүбүлүкэҕэ көҥүл тустууну сайыннарыы Концепцията аһары элбэх түһүмэхтээҕин, көнө дьайыыта суоҕун ыйда уонна саҥа дьылга диэри саҥа докумуону бэлэмнииргэ соруйда.
|