Егор Борисов Тиксиигэ сырыытын түмүгүнэн чопчу сорудахтары биэрдэ

Олунньу 18 күнүгэр Егор Борисов Тиксииттэн кэлээт да, вице-бэрэсидьиэн, бырабыыталыстыба бэрэссэдээтэлэ, Саха Өрөспүүбүлүкэтин Бэрэсидьиэнин уонна Бырабыыталыстыбатын дьаһалтатын салайааччыта уонна дьаһалта салааларын баһылыктара кыттыылаах былаанныыр мунньах ыытта.

Егор Афанасьевич мунньахха бөһүөлэккэ тахсыбыт саахал туһунан санаатын үллэһиннэ уонна көмөлөһөргө сорудах биэрдэ. Ол быһыытынан Саха сирин Бырабыыталыстыбата Тиксии дьиэлэрин сылытар радиотардарын уонна турубаларын уларытыыга үлэни элбэх кыбартыыралааах дьиэлэри хапытаалынайдык өрөмүөннээһиҥҥэ туһуланар өрөспүүбүлүкэтээҕи программаҕа киллэриэхтээх уонна быйыл атырдьах ыйыгар диэри саҥа хочуолунайы тутан үлэҕэ киллэриэхтээх. Сотору бырабыыталыстыба Тиксии дьиэтин-уотун өрөмүөннээһин, итиэннэ  эрэллээх уонна быстыбат сылааһынан, уотунан уонна уунан хааччыйыы кэлим былаанын оҥорон ылыныаҕа. Маны сэргэ бөһүөлэккэ тыа сирин сэлиэнньэтин статуһун иҥэрии боппуруоһа көрүллүөҕэ. Бырабыыталыстыбаҕа олохтоох федеральнай уорганнары кытта маннык балаһыанньа үөскээбитигэр буруйдаахтары, ол иһигэр Булуҥ улууһун уонна Тиксии бөһүөлэгин баһылыктарын, улуустааҕы ДЬКХ ГУП филиалын салайааччытын эппиэтинэскэ тардыы боппуруоһун көрөргө сорудах бэрилиннэ. Итини таһынан, СӨ Бэрэсидьиэнигэр үлэлиир Сүрүн хонтуруоллуур управление уонна өрөспүүбүлүкэ Ааҕар-суоттуур балаатата 2012 сылга Тиксиигэ ыытыллыбыт тутуу уонна өрөмүөн үлэлэрин бэрэбиэркэлиэхтэрэ уонна ол туһунан бөһүөлэк олохтоохторугар тиэрдиэхтэрэ. Тутууга уонна дьиэҕэ-уокка судаарыстыбаннай надзор управлениета бырайыактыыр-смиэтэлиир докумуоннарга экспертиза ыытыаҕа.
Егор Борисов Саха Өрөспүүбүлүкэтин Бэрэсидьиэнин уонна Бырабыыталыстыбатын дьаһалтатын иннигэр Булуҥ улууһугар СР Бэрэсидьиэнин бэрэстэбиитэлин уонна Тиксиигэ ыытыллар тутуу уонна өрөмүөн үлэтин хонтуруоллуур уопсастыбаннай хамыыһыйа туһунан сөбүлэһиллибит быһаарыныы бырайыагын киллэрэр сорудаҕы туруорда. Бырабыыталыстыба Бэрэссэдээтэлин солбуйааччыта Павел Маринычев сылааһы биэрии систиэмэтигэр баар алдьаныыны-кээһэниини туоратыыга эбии миэрэлэри ылынарга, бөһүөлэккэ пластиковай түннүктэри оҥорон таһаарыыны тэрийии боппуруостарын көрөргө, олохтоох биригээдэлэри бэдэрээт үлэтигэр кытыннарарга, нэһилиэнньэҕэ өрөмүөн үлэтин графигын, уоту араарыы - биэрии бириэмэтин тиэрдиини хааччыйарга сорудах ылла. Маны сэргэ Павел Маринычев дьиэ-уот-коммунальнай хаһаайыстыбатыгар уонна энергетикаҕа министиэристибэни кытта Бырабыыталыстыба Тиксии олохтоохторугар коммунальнай өҥө иһин төлөбүргэ хос ааҕыы оҥорор туһунан быһаарыныы ылынарыгар эппиэтинэстээх.
Өрөспүүбүлүкэ баһылыга Бырабыыталыстыба Бэрэссэдээтэлин солбуйааччыта Анатолий Скрыбыкиҥҥа Булуҥ улууһун нэһилиэнньэтэ аһынан-үөлүнэн хааччыллыытын хонтуруоллуурга сорудах биэрдэ. Доруобуйа харыстабылын министиэристибэтэ ыарыһахтары хаачыстыбалаах медицинскэй өҥөнөн хааччыйыахтаах уонна санитарнай авиацияны туһанан, ирдэнэр түгэҥҥэ эмтэнэр дьону Дьокуускайга уонна төттөрү Тиксиигэ илдьиини-аҕалыыны тэрийиэхтээх. Итини таһынан хотугу уонна арктическай улуустартан көрдөрүнэ кэлэр ыарыһахтарга анал график оҥоһуллуоҕа.
Үөрэх уонна үп министиэристибэлэрэ Булуҥ улууһуттан санаторийдарга сынньана уонна эмтэнэ барар үөрэнээччилэр айаннарын уонна путевкаларын төлүүргэ харчы көрүөхтэрэ. Итини сэргэ үөрэххэ уонна идэҕэ үөрэххэ, каадырдары бэлэмнээһиҥҥэ уонна туруорууга министиэристибэлэр Булуҥ улууһун үөрэнээччилэрин Дьокуускай куоракка ыытыллар үрдүк техническэй үөрэхтэр олимпиадаларыгар кытыннарыахтара.