|
20 Октября 2015 года, 19:40 |
|
Егор Борисов Мандар Ууһу үбүлүөйүнэн эҕэрдэлээн телеграмма ыытта
 Уран тарбахтаах норуот маастара, тимир ууһа, П.А. Ойуунускай аатынан Государственнай бириэмийэ лауреата, Саха Өрөспүүбүлүкэтин культураҕа үтүөлээх үлэһитэ, Саха Өрөспүүбүлүкэтин духуобунаска Академиятын академига, Таатта улууһун Бочуоттаах олохтооҕо, Саха Өрөспүүбүлүкэтин Аҕа Баһылыгын Саха сирин социальнай-экономическай уонна культурнай сайдыытыгар уһулуччулаах кылааты киллэрбит дьоҥҥо бэриллэр бириэмийэтин лауреата, норуот биир ытыктыыр киһитэ – Борис Федорович Неустроев - Мандар Уус алтынньы 20 күнүгэр 70 сааһын туолла.
Өрөспүүбүлүкэ Ил Дархана Егор Борисов Борис Федоровиһы үбүлүөйүнэн эҕэрдэлээн маннык ис хоһоонноох телеграмманы ыытта: «Ытыктабыллаах Борис Федорович! Саха Өрөспүүбүлүкэтин салалтатын аатыттан уонна тус бэйэм 70 сааскын томточчу туолбут кэрэ-бэлиэ күҥҥүнэн итиитик-истиҥник эҕэрдэлиибин! Эн тимиринэн уһаныыга, саха норуотун култууратын, этнографиятын, духуобунаһын сайдыытыгар, итиэннэ ыччаты иитиигэ үгүс сыллар усталарыгар далааһыннаахтык үлэлээҥҥин биир дойдулаахтарыҥ, дьон-сэргэ дириҥ ытыктабылын ыллыҥ. Айымньылаах олоҕун үүнэн иһэр көлүөнэ ыччакка үтүө холобур буолар, уран үлэлэриҥ – охсубут сытыы быһахтарыҥ, лыҥкынас хомустарыҥ бүтүн Россиятааҕы быыстапкаларга улахан биһирэбили ылаллар, саханы ааттаталлар. Эн норуот тумус туттар дьонноруттан биирдэстэрэ буолаҕын. Саха сирин салалтатын аатыттан уонна тус бэйэм өрөспүүбүлүкэ уонна Таатта улууһун сайдыытыгар киллэрбит сүҥкэн кылаатын иһин барҕа махталбын биллэрэбин! Чэгиэн-чэбдик буол, эйиэхэ уйгу-быйаҥ эҥэрдэстин! Күөрдүн уота суостаах буоллун, кыһаҕыттан уран оҥоһуктар айылла турдуннар. Саха Өрөспүүбүлүкэтин Ил Дархана Егор Борисов». |
